1. ზოგადი დებულებები
ეს პირობები არეგულირებს ვებგვერდ eval.ge-ისა და მასზე განთავსებული შეფასების სამუშაო სივრცის (შემდგომში „პლატფორმა“) გამოყენებას. პლატფორმას მართავს შპს „მეტაგენი“ (საიდენტიფიკაციო კოდი 444444444, მისამართი: [იურიდიული მისამართი]; შემდგომში „ჩვენ“).
ანგარიშის შექმნით ან პლატფორმის გამოყენებით ადასტურებთ, რომ გაეცანით და ეთანხმებით ამ პირობებს და კონფიდენციალურობის პოლიტიკას. თუ პლატფორმას იყენებთ კომპანიის სახელით, ადასტურებთ, რომ უფლებამოსილი ხართ, ეს პირობები მის სახელით მიიღოთ.
პლატფორმა განკუთვნილია პროფესიული გამოყენებისთვის: შემფასებლებისა და შეფასების კომპანიებისთვის. მომხმარებელი უნდა იყოს სრულწლოვანი.
2. ტერმინები
- სამუშაო სივრცე: მომხმარებლების ჯგუფის საერთო სივრცე დავალებებით, დოკუმენტებითა და კრედიტების ბალანსით.
- მფლობელი: სამუშაო სივრცის წევრი, რომელიც მართავს წევრებს, შენაძენებსა და მონაცემების წაშლას.
- კრედიტი: სამუშაო სივრცის ბალანსის ერთეული, რომლითაც ფასიანი ოპერაციები იფარება. კრედიტი არ არის ფულადი სახსარი, ფულზე არ გადაიცვლება და მისი ღირებულება არ ბრუნდება.
- AI შემოთავაზება: ხელოვნური ინტელექტის მიერ მომზადებული ტექსტი, მონაცემი ან შენიშვნა, რომელიც შედეგი ხდება მხოლოდ შემფასებლის დამტკიცების შემდეგ.
3. ანგარიში და სამუშაო სივრცე
- რეგისტრაციისას მიუთითეთ ნამდვილი ელფოსტა და შეინახეთ პაროლი საიდუმლოდ.
- ერთი ანგარიში ეკუთვნის ერთ ადამიანს; ანგარიშის სხვისთვის გადაცემა დაუშვებელია.
- მფლობელი პასუხისმგებელია მის მიერ მოწვეული წევრების როლებზე და მათ მიერ სამუშაო სივრცეში შესრულებულ ქმედებებზე.
- ანგარიშზე არასანქცირებული წვდომის ეჭვის შემთხვევაში დაუყოვნებლივ მოგვწერეთ info@eval.ge-ზე.
4. სერტიფიცირება
კრედიტის დახარჯვა შესაძლებელია მხოლოდ იმ სამუშაო სივრცეში, რომლის სულ მცირე ერთი წევრი შეყვანილია შემფასებელთა სერტიფიცირების საჯარო რეესტრში (certification.org.ge) შესაბამისი ქონების ტიპისთვის: მოძრავი ქონების სერტიფიკატი ფარავს ავტომობილებს, მანქანა-დანადგარებსა და აღჭურვილობას, უძრავი ქონებისა კი დანარჩენ ქონებას.
რეესტრიდან ამოღების ან სერტიფიკატის ვადის გასვლიდან 14 დღის შემდეგ, თუ სამუშაო სივრცეში სხვა სერტიფიცირებული წევრი არ რჩება, ახალი ხარჯვა ჩერდება და აქტიური გეგმის მომავალი გადახდები უქმდება. უკვე დაფინანსებული სამუშაო გრძელდება და მონაცემები ხელმისაწვდომი რჩება.
5. მომსახურების არსი და პროფესიული პასუხისმგებლობა
პლატფორმა არის სამუშაო ინსტრუმენტი: ეხმარება დოკუმენტების დამუშავებაში, ანალოგების მოძიებაში, გაანგარიშებაში, ანგარიშის შედგენასა და არსებული ანგარიშის აუდიტში. პლატფორმა არ ახორციელებს შეფასებას და არ გასცემს პროფესიულ დასკვნას.
- AI შემოთავაზება შეიძლება იყოს არასრული ან მცდარი. შემფასებელი ვალდებულია, გადაამოწმოს ყოველი შემოთავაზება დამტკიცებამდე.
- შეფასების დასკვნაზე, ანგარიშის შინაარსსა და შეფასების სტანდარტებისა და კანონმდებლობის მოთხოვნებთან შესაბამისობაზე სრულად პასუხისმგებელია შემფასებელი.
- აუდიტის დასრულება არ ნიშნავს ანგარიშის დამტკიცებას; „ვერ გადამოწმდა“ არ ნიშნავს შესაბამისობას.
6. გამოყენების წესები
აკრძალულია:
- ისეთი დოკუმენტის ან პერსონალური მონაცემის ატვირთვა, რომლის დამუშავების კანონიერი საფუძველი არ გაქვთ;
- პლატფორმის გამოყენება შეგნებულად მცდარი ან შეცდომაში შემყვანი შეფასებისთვის;
- სხვა შემფასებლის სახელით ან სერტიფიკატით სარგებლობა;
- მავნე პროგრამის ან სისტემის მანიპულირებისთვის შექმნილი შინაარსის ატვირთვა;
- პლატფორმაზე ავტომატიზებული მასობრივი წვდომა, მისი კოდის დეკომპილაცია, უსაფრთხოების ან ლიმიტების გვერდის ავლის მცდელობა;
- პლატფორმაზე წვდომის გაყიდვა ან მესამე პირისთვის გადაცემა ჩვენი თანხმობის გარეშე.
7. ფასები და გადახდა
- მოქმედი ფასები განთავსებულია ფასების გვერდზე და მითითებულია ლარში.
- გადახდა ხორციელდება საბანკო ბარათით, გადახდის მომსახურების პროვაიდერ Flitt-ის მეშვეობით. ბარათის მონაცემებს ჩვენ არ ვინახავთ.
- გეგმა ყოველთვიურად ავტომატურად განახლდება შეძენისას მითითებული ვადით, სანამ მას მფლობელი არ გააუქმებს. გაუქმება შესაძლებელია ნებისმიერ დროს კრედიტების გვერდიდან.
- ოპერაციის ფასი წინასწარ ჩანს და მოითხოვს დადასტურებას. კრედიტი იბლოკება დაწყებისას და ჩამოიჭრება მხოლოდ გამოსადეგი შედეგის მიღებისას; სისტემის შეცდომისას ავტომატურად ბრუნდება.
- ფასის ცვლილებას გამოვაქვეყნებთ სულ მცირე 14 დღით ადრე. ცვლილება არ ეხება უკვე გადახდილ პერიოდსა და შეძენილ კრედიტებს.
- გადახდილი თანხა არ ბრუნდება. დაწვრილებით: გადახდა და გაუქმება.
8. კონტენტი და ინტელექტუალური საკუთრება
თქვენ მიერ ატვირთული დოკუმენტები და შექმნილი ანგარიშები გეკუთვნით. ჩვენ ვიყენებთ მათ მხოლოდ მომსახურების გასაწევად და არ ვიყენებთ AI მოდელების გასაწვრთნელად.
პლატფორმა, მისი პროგრამული კოდი, დიზაინი, შაბლონები და ბრენდი ჩვენი საკუთრებაა. პირობების დაცვით გეძლევათ პლატფორმის გამოყენების არაექსკლუზიური, გადაუცემადი უფლება.
9. პერსონალური მონაცემების დამუშავება თქვენი სახელით
შეფასების დავალებაში ატვირთული მონაცემები (მაგალითად, დამკვეთის ან მესაკუთრის ვინაობა, საკადასტრო და საბანკო ინფორმაცია) „პერსონალურ მონაცემთა დაცვის შესახებ“ საქართველოს კანონის მიზნებისთვის მუშავდება შემდეგნაირად: დამმუშავებელია სამუშაო სივრცე (შემფასებელი ან შეფასების კომპანია), ხოლო ჩვენ ვართ უფლებამოსილი პირი. ჩვენ:
- ვამუშავებთ მონაცემებს მხოლოდ მომსახურების გასაწევად და თქვენი მითითებით;
- ვუზრუნველყოფთ წვდომის კონტროლს, დაშიფვრას და სამუშაო სივრცეების იზოლაციას;
- ვიყენებთ მხოლოდ კონფიდენციალურობის პოლიტიკაში ჩამოთვლილ ქვე-დამმუშავებლებს;
- ინციდენტის შესახებ გაცნობებთ გაუმართლებელი დაყოვნების გარეშე;
- დაგეხმარებით მონაცემთა სუბიექტის მოთხოვნებზე პასუხის გაცემაში;
- მფლობელის მოთხოვნით სამუდამოდ ვშლით დავალებას და მის ფაილებს.
თქვენ პასუხისმგებელი ხართ, რომ ატვირთული მონაცემების დამუშავებისა და ჩვენთვის გადაცემის კანონიერი საფუძველი გაქვთ.
10. ხელმისაწვდომობა
ვცდილობთ, პლატფორმა უწყვეტად მუშაობდეს, თუმცა შესაძლებელია დროებითი შეფერხება ტექნიკური სამუშაოების ან მესამე მხარის მომსახურების გამართულობის გამო. ფუნქციონალს შეიძლება დავამატოთ, შევცვალოთ ან ამოვიღოთ.
11. პასუხისმგებლობის შეზღუდვა
პლატფორმა მოწოდებულია „როგორც არის“. კანონით დაშვებულ ფარგლებში არ ვაგებთ პასუხს არაპირდაპირ ზიანზე, მიუღებელ შემოსავალზე ან პლატფორმის შედეგზე დაყრდნობით მიღებულ გადაწყვეტილებაზე. ჩვენი ჯამური პასუხისმგებლობა შემოიფარგლება ბოლო 12 თვეში თქვენ მიერ გადახდილი თანხით. შეზღუდვა არ ვრცელდება განზრახ ან უხეში გაუფრთხილებლობით მიყენებულ ზიანზე.
12. შეჩერება და შეწყვეტა
პირობების დარღვევისას შეგვიძლია შევაჩეროთ ან დავხუროთ ანგარიში ან სამუშაო სივრცე, რაზეც, შესაძლებლობის შემთხვევაში, წინასწარ გაცნობებთ. თქვენ შეგიძლიათ პლატფორმის გამოყენების შეწყვეტა ნებისმიერ დროს; ანგარიშის დახურვის მოთხოვნა გამოგვიგზავნეთ info@eval.ge-ზე.
13. პირობების ცვლილება
არსებით ცვლილებას გაცნობებთ ელფოსტით ან პლატფორმაში ძალაში შესვლამდე სულ მცირე 14 დღით ადრე. ცვლილების შემდეგ პლატფორმის გამოყენება ნიშნავს ახალ პირობებზე თანხმობას.
14. მარეგულირებელი სამართალი
პირობები რეგულირდება საქართველოს კანონმდებლობით. დავა წყდება მოლაპარაკებით, ხოლო შეთანხმების მიუღწევლობისას საქართველოს საერთო სასამართლოებში.
15. კონტაქტი
კითხვები გამოგვიგზავნეთ info@eval.ge-ზე ან იხილეთ კონტაქტის გვერდი.